Svona verða menn milljónamæringar

Villtu verða milljónamæringur? Þá skaltu fyrst gerast billjónamæringur og kaupa svo flugfélag!

Stal þessum frasa af bloggi Jóns Garðars Hreiðarssonar á eyjan.is, en þar birtist hann á kommenti og er eignaður múltímillanum Charles Branson. Annars, er þetta ekki frekar haft eftir Richard Branson? Sá síðarnefndi ætti allavega að geta talað af eigin reynslu.

Svo er alveg frábær mynd í Viðskiptablaðinu í dag, af 10 litlum millastrákum!

Mikil verðlækkun í Kauphöll

Til hamingju

Til hamingju Jón Gunnar Ottósson með nýja starfið.

Til hamingju Íslendingar með væntanlega aukið vægi Bernarsamningsins á Íslandi.

Til hamingju Evrópubúar með að hafa fengið Jón Gunnar sem forseta Bernarsamningsins.

Nánar má lesa um Bernarsamninginn með því að pota músarbendlinum HÉR! 

Forstjóri NÍ kjörinn forseti Bernarsamningsins

Kjaftæði

Af hverju er talað um tímamótaviðræður í tengslum við fund Bush, Olmerts og Abbas í Bandaríkjunum?

Niðurstaða fundarins er langtíma fundaplan án fundarefnis.  

Það er ekki einu sinni samkomulag um hvaða ágreiningsmál eigi að ræða og þaðan af síður hvernig. 

Með þessu er verið að reyna að blekkja þá sem krefjast þess að tekið sé á málunum.

Halda fjölmiðlum uppteknum við rulluna fundur, handaband, mynd. En, engar ákvarðanir. 

Þetta er bókstaflega KJAFTÆÐI.

Getur annars einhver bent á nokkuð annað sem frá þessum fundi kom? 

Palestínu skipt fyrir 60 árum

Ég er að flýta mér

Af hverju liggur okkur þessi reiðinnar býsn á?

Ég vil fara styttstu leið! Ég labba á ská yfir grasbleðilinn frekar en að fylgja göngustíg meðfram honum. Ég fer þvert yfir hálendið frekar en hringveginn. Snjór? Bara mok'ann! Útsýni? Það truflar fólk við aksturinn. Af hverju haldið þið annars að dráttarklárar hafi haft augnleppa? Svo fæst þessi vegur lagður í einkaframkvæmd, við þurfum ekki einusinni að borga hann með sköttunum okkar. Eða, er það annars ekki þannig sem einkaframkvæmd virkar?

Landvernd leggst gegn lagningu heilsársvegur um Kjöl

Dró úr drykkju þegar pöbbinn lokaði

Af hverju halda margir því fram að áfengisneysla sé betri en önnur fíkinefnaneysla?

Fullyrðingar um að unglingadrykkja hafi alltaf verið til og sé því ekki vandamál, unglingar vaxi upp úr drykkju, áfengisneysla sé betri en andskotans dópið og vandamálið sé einkum velmeinandi en kengruglaðir vandamálafræðingar, hafa allar komið fram á bloggum um þessa frétt fram að þessu.

Unglingadrykkja hefur valdið áhyggjum eins lengi og hún hefur verið við lýði. Það sýnir aðeins að hún er enn sama vandamál og hún var talin fyrrum.

Sem betur fer vaxa flestir upp úr slæmri áfengisneyslu. En það er samt staðreynd að því yngra sem fólk fer flatt á áfengisneyslunni, því verr á það með að ná tökum á henni. Það er einmitt á þeirri reynslu byggt, sem lögð er áhersla á að því seinna sem fólk byrjar að neyta áfengis, því minni líkur séu á að áfengisneysla muni valda því skaða.

Áfengisneysla er lang oftast fyrsta vímuefnanotkunin, jafnvel á undan sígarettum, enda fleiri unglingar sem drekka en reykja. Áfengi er lang útbreiddasta vímuefnið og það sem veldur mestum skaða á líkömum, sálum og efnislegum verðmætum. Einstaka önnur vímuefni fara verr með einstaklinga, en þeirra er neytt í minna mæli og heildaráhrif þeirra í samfélaginu því minni.

Vel meinandi vandamálafræðingar hafa einfaldlega komist að því, sem flestir foreldrar og allir sem vinna með unglinga vita, að fjöldi þeirra sem hafa neytt áfengis tvöfaldast á hálfa árinu frá því í mars, þegar unglingurinn er í 10. bekk og þar til í október á sama ári, eftir að hann er kominn í framhaldsskóla eða út á vinnumarkaðinn.

Svo er smá innlegg í umræðuna um aðgengi að áfengi og sölu þess í matvöruverslunum:
Ég fullyrði að það hafi dregið úr fimmtudagsfylleríi unglinga á Selfossi eftir að þær breytingar urðu á rekstri veitingahúsa hér í bæ að unglingar hafa ekki lengur aðgang að vínveitingahúsi á fimmtudagskvöldum.

Áfengisneysla framhaldskólanema áhyggjuefni

Glæpabörn

Af hverju fremja börn kynferðisbrot og geta börn verið glæpamenn?

Þessi spurning vaknaði við lestur fréttar um tvo drengi sem ákærðir hafa verið fyrir að nauðga telpu.

Pistillinn minn hér á eftir er hins vegar innlegg mitt á kommentakerfið hjá Heiðu B. 

Ég byrja á að svara seinni spurningunni: Börn geta ekki verið glæpamenn. Þau geta vissulega breytt rangt og verknaður þeirra getur vissulega haft mjög alvarlegar afleiðingar í för með sér. Þau geta líka breytt gegn betri vitund, en það segir ekki að þau geri sér grein fyrir eðli eða afleiðingum verknaðar síns. Þau hafa ekki þroska til þess fyrr en tilteknum aldri er náð, og það eru ekki mikil frávik í því á hvaða aldri hver einstaklingur nær þeim þroska. Þess vegna eru til lög um sakhæfisaldur.

Svo svara ég fyrri spurningunni: Börn fremja kynferðisbrot ýmist í algjöru sakleysi og ekki hægt að kenna athæfi þeirra við brot, eða af því að þau hafa á einhvern hátt upplifað illa framkomu í kynlífi.
Það fyrrnefnda er eins og ég sagði ekki brot, heldur eðlilegt sakleysi. Það er t.d. mikill munur á því að barn stríplist eða fullorðinn. Eins er með að barn kíki á kynfæri annars barns eða snerti þau, en það kemur að þeim aldri að slík hegðun er ekki ásættanleg lengur.
Svo geta börn hafa sætt kynferðislegu ofbeldi, sem ýmist er framkvæmt á þeim sjálfum, eða þau orðið vitni að og þá vek ég athygli á hve vanmetin eru áhrif alls þess kynferðislega ofbeldis sem börn sjá í sjónvarpstækjum. Þetta ofbeldi vekur hjá þeim vanlíðan og þau bregðast við henni á hátt sem okkur finnst órökréttur. Það rökrétta er einmitt að þau bregðist órökrétt við af því að þau eru börn.

Kynferðisglæpamenn hófu margir að sýna óviðurkvæmilega kynferðislega hegðun á unga aldri. Slíka hegðun þarf að taka alvarlega, ekki til að refsa fyrir hana, heldur til þess að átta sig á af hverju hún stafar og hvort þar þurfi að grípa til einhverra ráðstafana.

Góð hefð á Selfossi

Hér á Selfossi hefur skapast sú hefð að halda árlegan hjóladag að vori. Þá afhenda Kiwanismenn 1. bekkingum hjálmana, lögreglan skoðar hjólin og Björgunarfélag Árborgar leggur til aðstöðu og mannskap til aðstoðar við framkvæmdina. Á eftir er hjólað út í grunnskóla þar sem er smá móttaka og drykkur frá MS.

Vonandi að þessi hefð haldist sem lengst og gott mál að þetta samstarf skuli endurnýjað.

 

Eimskip kostar hjálmaverkefni Kiwanis næstu þrjú árin

Hriktir í samhengi

Af hverju eru jarðskjálftar á þessu svæði?

Af því þetta er hluti af Suðurlandsbrotabeltinu. 

Af hverju er ekki talin ástæða til að ætla að skjálftahrinan sé fyrirboði um stærri skjálfta?

Af því að það á ekki að hræða almenning.

Af hverju eru skjálftar á Suðurlandsbrotabeltinu þegar svona stutt er síðan Suðurlandsskjálftinn var?

Af því að Suðurlandsskjálftinn er ekki afstaðinn.

Af hverju segi ég að Suðurlandsskjálftinn sé ekki afstaðinn, næstu öld eða svo?

Af því m.a. að ég hef lesið þessa grein! 

 

Áframhaldandi skjálftar við Selfoss

Svo verða það kýrnar

Af hverju er það svona stórt mál að slátra 55 geitum?

Jú, af því að þær eru 13% alls stofnsins! Hvenær kemur að því að við fáum svona frétt um slátrun kúa af íslenska kyninu? Nokkrum árum eftir að við leyfum innflutning á erlendu kúakyni!

Farið hefur fé betra en gagnslausar geitur! Eða hvað?

Ísland er aðili að skuldbindingum um verndun og fjölbreytileika lífríkis, þar með því að viðhalda fjölbreytileika innan einstakra dýrategunda, bæði villtra dýra og húsdýra. Hvað erum við svo að leggja af mörkum til þessa?

Við eigum einstakt kyn húsdýra á Íslandi, dýra sem búa yfir eiginleikum sem búið er að rækta út úr mörgum öðrum stofnum, af því þar var verið að einblína á nokkra eiginleika og yfirsást um leið hvaða eiginleikar aðrir töpuðust. Þetta á við um hestana okkar, kýrnar, kindurnar, geiturnar og hænurnar, en við erum búin að glata svínastofninum. Það er lengra mál en svo að ég fari út í það hér og nú hvaða mikilvægu eiginleikum húsdýrastofnar okkar búi yfir, en hvet til að það verði skoðað af alvöru. Þetta snýst ekki um það að vilja ekki fara út úr moldarkofanum. Þetta snýst um það að hætt að vanmeta það sem maður hefur og halda að dót nágrannans sé alltaf betra.

Ætla að gefa mér tíma til að skrifa meira um þetta síðar. Athugasemdir vel þegnar.

Geitahjörð slátrað í dag

Þeir sem hafa komið á staðinn

Af hverju eru Hvergerðingar á móti Bitruvirkjun?
Kannski af því að þeir hafa öðrum frekar komið á Ölkelduháls þar sem þessi Bitruvirkjun á að rísa.
Svo sjá þeir líka hvernig umgengnin er um Hellisheiðarvirkjanirnar, vegirnir, borplönin, vatnslagnirnar og raflínurnar. Þeir láta því ekki segja sér hvað sem er.
Hvaða rugl er það svo að vera alltaf að kenna þessa Bitruvirkjun við Hellisheiði. Sumir virðast halda að Hellisheiði nái frá Hveragerði til Reykjavíkur og norður að Þingvallavatni. Hún er nú talsvert minni en það. Vissulega er Ölkelduháls skammt frá Hellisheiði, en náttúran þar er mjög ólík því sem við sjáum út um bílgluggan á leið okkar um þá heiði.
Sjá fyrri færslu um Bitruvirkjun.

Óábyrgt að halda áfram með Bitruvirkjun